Хитой расмийлари йўқолган соатни қидириш учун фаррошларга тонналаб ахлатларни элакдан ўтказишни буюрди

Хитой расмийлари болаларнинг ақлли соатини топиш учун фаррошларни жазирама иссиқда 4 соат давомида ахлатни элакдан ўтказишга мажбур қилди.

Бу ҳақда South China Morning Post нашри хабар берди.

Хитойнинг Датун шаҳридаги маҳаллий ҳокимиятлар сайёҳнинг боласи йўқотиб қўйган ақлли соатни топиш бўйича кенг кўламли операцияни бошлаганидан сўнг интернетда кескин танқидга учради. Операция давомида иккита тозаловчи қаттиқ жазирамада 8 тонна ахлатни қўлда қазишга мажбур бўлди.

Воқеа Шэньчжэнлик она фарзанди билан Датун шаҳрига ташриф буюрганида тасодифан ўғлининг соатини поезд бортидаги ахлат халтасига ташлаб юборганида содир бўлган. Қурилмада жойлашув функцияси бор эди, бу унинг ҳали ҳам поезд станциясида эканлигини кўрсатди.

Эртаси куни аёл маҳаллий муниципал ҳукуматга ёрдам сўраб мурожаат қилди. Ходимлар чиқиндиларни утилизация қилиш билан шуғулланувчи Xincheng Environment Company давлат корхонаси билан боғланди. У ерда улар соат 8 тонна чиқинди билан бирга полигонга олиб кетилганини аниқладилар.

Икки ишчига йўқолган қурилмани топиш учун барча ахлатларни қўлда саралаш топширилди. Гаджетни топиш учун уларга 4 соатдан кўпроқ вақт керак бўлди. Онаси уларга мукофот беришни таклиф қилди, аммо ишчилар пулни рад этишди.

Расмийлар бу ҳолатни “сайёҳларга нисбатан сезгир муносабат” ва “жамиятга хизмат кўрсатиш намунаси” сифатида кўрсатганига қарамай, Хитойдаги интернет фойдаланувчилари маҳаллий амалдорларнинг ҳаракатларини танқид қилишди. "Бунчалик арзимаган нарса учун бундай улкан саъй-ҳаракатлар қилинганидан ҳайратдаман. Мен тушунмаяпман", деб ёзади шарҳловчилардан бири.