WUF13 — Ozarbayjonning zamonaviy qiyofasi va barqaror urbanizatsiya sari qadami

Bu haqda Manset.az axborot portalining hamta’sischisi va bosh muharriri Ali Valiyev WUF13 doirasida Ozarbayjon-Slavyan Yoshlar Assotsiatsiyasi tomonidan tashkil etilgan “Barqaror shaharsozlik: Ozarbayjon va Yevropa tajribasi” mavzusidagi panel tadbirida chiqish qilarkan, ma’lum qildi.

Uning ta’kidlashicha, WUF13 kabi nufuzli xalqaro tadbirning aynan Ozarbayjonda o‘tkazilishi mamlakat uchun katta ahamiyatga ega. Forum orqali Ozarbayjon xalqaro hamkorlikni mustahkamlaydi, yangi hamkorlik aloqalarini o‘rnatadi va turli mamlakatlar tajribasini o‘rganish imkoniyatiga ega bo‘ladi:

“Shu bilan birga, tadbir mamlakatning investitsiya, turizm va iqtisodiy salohiyatini targ‘ib qilish nuqtai nazaridan ham muhimdir. Forum Ozarbayjonning global masalalar muhokamasida faol ishtirok etayotganini, zamonaviy va rivojlanayotgan davlat sifatida xalqaro maydonda o‘z so‘ziga ega ekanini ko‘rsatadi”.

Bosh muharrir qayd etishicha, bugungi kunda barqaror shaharsozlik shunchaki me’morchilik va qurilish masalasi emas, balki kelajak hayot modelidir:

“Shaharlar shunday qurilishi kerakki, unda insonlar qulay yashasin va tabiat ham asrab qolinsin. Ozarbayjon so‘nggi yillarda bu yo‘nalishda muhim qadamlar tashlamoqda. Ayniqsa, ozod etilgan hududlarda amalga oshirilayotgan ‘aqlli shahar’ va ‘aqlli qishloq’ loyihalari zamonaviy urbanizatsiya modelining yorqin namunasi hisoblanadi. Bu yerda asosiy e’tibor yashil energiya, ekologik muvozanat, jamoat transportining qulayligi va aholining ijtimoiy farovonligiga qaratilgan. Biz ham ushbu tajribadan foydalanib, shaharlarimizni yanada yashil, xavfsiz va innovatsion qilishga intilmoqdamiz”.

Ali Valiyev so‘zining yakunida bunday xalqaro platformalarning ahamiyatini yana bir bor ta’kidladi:

“Bunday xalqaro platformalar mamlakatlar o‘rtasida tajriba almashish uchun nihoyatda muhimdir. Chunki kelajak shaharlarini faqat bitta mamlakat emas, balki butun dunyo birgalikda shakllantiradi. Ozarbayjonning bunday nufuzli tadbirga mezbonlik qilishi esa uning global shaharsozlik va barqaror rivojlanish kun tartibida faol rol o‘ynayotganini ko‘rsatadi”.