Венгрия “Европани яна буюк қилиш”га ваъда берди

Июль ойида Еврокенгашга раислик қилувчи Венгрия Европани яна буюк қилишга ваъда берди.

Шунга ўхшаш – “Американи яна буюк қилинг” шиори АҚШнинг собиқ раҳбари Дональд Трампнинг 2016 йилги сайловолди шиори бўлган.

Бизнинг шиоримиз фаол, амалий раислик, биргаликда кучлироқ эканлигимизни назарда тутади, — деди Венгриянинг Европа Иттифоқи ишлари бўйича вазири Янош Бока матбуот анжуманида.

Венгрия Евроиттифоқ Кенгашига бўлажак раислик қилиш учун еттита устувор йўналишни белгилаган. Улар орасида ноқонуний миграцияга қарши кураш ҳам мавжуд.

Европадаги ноқонуний муҳожирларга қарши кураш ЕИ давлатлари ҳамда асосий келиб чиқиш ва транзит мамлакатлари ўртасида самарали ҳамкорликни талаб қилади, — дея қўшимча қилган венгриялик вазир.

Маълум бўлишича, Будапешт ЕИ Кенгаши раис сифатида ўз олдига Европа Иттифоқини кенгайтириш жараёнларини “мувозанатлаш” вазифасини қўйган. Хусусан, келгуси олти ой ичида ушбу минтақадан номзод давлатлар билан имкон қадар кўпроқ музокара блокларини ёпиш режалаштирилган.

Венгриянинг санаб ўтилган устувор йўналишлари орасида “Украинани қўллаб-қувватлаш” ибораси тилга олинмаган. Европа Иттифоқининг рақобатбардошлиги, учинчи давлатлар билан иқтисодий алоқалар, маъмурий юкни енгиллаштириш, мудофаа сиёсати, қурол-яроғ соҳасидаги ҳамкорлик каби соҳалар ҳақида сўз юритилган.