Варшавада минглаб одамлар ноқонуний миграцияга қарши намойиш ўтказди — АFP

Агентликнинг хабар беришича, намойишчилар Полша байроқларини кўтариб, “Миграцияга йўқ!” деган шиорларни бақиришди. Шунингдек, норозилик акцияси қатнашчилари миллий-консерватив “Ҳуқуқ ва Адолат” (PiS) партияси қўллаб-қувватлаётган президентликка номзод Карол Навроцкийнинг номини тилга олишди.

Полшада президентлик сайловининг биринчи тури 18 май куни бўлиб ўтади. Асосий номзодлар сифатида Миллий хотира институти раҳбари Карол Навроцкий ва Варшава шаҳри мэри Рафал Тшасковский кўрилмоқда. Навроцкийни амалдаги президент Анжей Дуда ва унинг миллий-консерватив “Ҳуқуқ ва Адолат” (PiS) партияси қўллаб-қувватламоқда, Тшасковский эса бош вазир Доналд Туск етакчилигидаги марказчи-ўнгчи “Фуқаролик платформаси” партиясидан президентликка номзод сифатида кўрсатилган.

Тахминларга кўра, улардан ҳеч бири сайловнинг биринчи турида ғалаба қозона олмайди ва овоз беришнинг иккинчи тури ўтказилади.

Аввалроқ Полша Рақамлаштириш вазири Кшиштоф Гавковский Россияни Полшадаги президентлик сайловларига аралашишда айблаб, мамлакат Москванинг диверсия, киберҳужумлар ва ёлғон ахборот тарқатишга қаратилган фаолиятининг асосий нишонларидан бирига айланганини таъкидлаган эди.