Ўзбекистонда 10 та хусусий клиника лицензиясиз хизматлар кўрсатаётгани маълум бўлди

Рақобатни ривожлантириш ва истеъмолчилар ҳуқуқларини ҳимоя қилиш қўмитаси Ўзбекистондаги хусусий тиббиёт муассасалари фаолиятида бир қатор қонунбузарликлар, жумладан, лицензиясиз хизматлар кўрсатиш ҳолатларини аниқлади.

Текширув истеъмолчилар ҳуқуқларини ҳимоя қилиш соҳасида фаолият юритувчи нодавлат, нотижорат ташкилотлари билан ҳамкорликда ўтказилган.

Қўмита маълумотларига кўра, республикадаги барча хусусий тиббиёт муассасаларининг 85 фоизи (8486 тадан 7284 таси) қамраб олинган ўрганишлар давомида қуйидаги ҳуқуқбузарликлар аниқланган:

• 27,4 фоизи (2000 таси) амалда кўрсатилган манзилда фаолият юритмаган;
• 3 фоизида (235 таси) пешлавҳалари мавжуд эмас;
• 47 фоизида (3428 таси) ташқи реклама объектлари жойлаштирилган;
• 20 фоизида (1460 таси) ахборотлар давлат тилида берилмаган;
• 61,5 фоизида (4483 таси) хизматларнинг нархномалари кўрсатилмаган.

Бундан ташқари, айрим тиббиёт ташкилотларининг лицензиясида мавжуд бўлмаган фаолият билан ҳам шуғулланаётганлик ҳолатлари аниқланган. Буларга қуйидагилар киради:

• Самарқанд вилояти — AFX Dardga Shifo;
• Сурхондарё вилояти — Nigora Plus Charos Med, Sherobod Shifo Maskani;
• Тошкент вилояти — Qiziltog Dental, Murod Yorqin Najot, Chirchiq Zinnura Stom, Tursunoy Faxr Stom, Buloqboshi Sog’lomlashtirish Klinikasi;
• Фарғона вилояти — Zaylobiddin Shifo Nur, U-Shifo Center;

Тўпланган материаллар чора кўриш учун мутасадди органларга тақдим этилган.