Ўзбекистон заргарлик буюмлари экспортини йиллик $300 миллионга чиқармоқчи

Ўзбекистонда қимматбаҳо металларни қайта ишлашнинг йиллик ҳажмини 7 тоннага, заргарлик буюмларини экспорт қилиш кўрсаткичларини эса 300 млн АҚШ долларига етказиш режалаштирилмоқда.

Бу борада қабул қилинган «Заргарлик буюмларини ишлаб чиқариш соҳасини қўллаб-қувватлаш бўйича қўшимча чора тадбирлар тўғрисида»ги ПҚ-207-сонли қарор билан, шунингдек, қимматбаҳо металлар ва заргарлик буюмларининг норасмий айланмасини камида 50 фоизга қисқартириш ҳам кўзда тутиляпти.

Қарорга кўра, заргарлик марказларида фаолият юритаётган тадбиркорларга қуйидаги қўллаб-қувватлаш чоралари тақдим этилади, жумладан:

• қимматбаҳо металларни кечиктириб тўлаш шарти билан сотишда 90 кун ичида амалга оширилган тўловлар қисмига фоиз ҳисобланмайди, 91-кундан бошлаб 180-кунгача амалга оширилган тўловлар қисмига – йиллик 3 фоиз миқдорида фоиз ҳисобланади;
• заргарлик марказларида «Ўзбекзаргарсаноати» уюшмаси ва Давлат асиллик даражаси назорати инспекциясининг филиаллари фаолияти (сайёр хизмат кўрсатиш) йўлга қўйилади;
• заргарлик марказларида фаолият юритаётган тадбиркорлар «Ўзбекзаргарсаноати» уюшмасига аъзо бўлганда аъзолик бадалини 50 фоизлик чегирма билан тўлайди.