Ўзбекистон жорий йилнинг 8 ойида 29 минг электромобил импорт қилди

2025 йилнинг саккиз ойида Ўзбекистонга 29 мингга яқин электромобил олиб кирилган. Бу ўтган йилги кўрсаткичдан икки баробар кўпдир.

Ўзбекистон Божхона қўмитаси маълумотларига кўра, 2025 йил январ–август ойларида мамлакатга 42 минг 230 дона енгил автомобиллар олиб кирилган. Улар учун тўланган умумий сумма 640,7 млн долларни ташкил этган. Бу ўтган йилнинг шу даврига нисбатан камроқ — 2024 йилда 47 минг 928 дона автомашина 914,7 млн долларлик импорт қилинган эди.

Айниқса электромобиллар импортидаги кескин ўсиш эътиборга молик. 2025 йилнинг саккиз ойида мамлакатга 28 минг 948 дона электрокар олиб кирилган. Бу 2024 йилнинг шу давридаги 12 минг 907 дона кўрсаткичдан икки баробар кўпдир. Мос равишда, молиявий харажатлар ҳам сезиларли ошган: ўтган йилги 166,7 млн долларга нисбатан икки баробардан ортиқ — 358,9 млн доллар

Ана шундай ўсиш фонида бензин ва ҳибрид двигателли автомобиллар импорти эса пасайган. Бензинда ҳаракатланувчи 11 минг 166 дона авто учун 233,6 млн доллар сарфланган бўлса, 2024 йилда бу кўрсаткич 24 минг 995 дона ва 541,1 млн долларни ташкил этган эди. Ҳибрид автомашиналар импорти ҳам 2025 йилда 2025 донани ташкил этиб, 46,1 млн долларлик тушум билан қайд этилди. Бу эса ўтган йилги 10 минг 017 дона ва 192,8 млн долларлик импортдан анча камдир.

Шу билан бирга, дизел автомобиллар импортида оз бўлса-да ўсиш кузатилмоқда. 2025 йилда 91 дона дизел моторли авто олиб кирилган бўлиб, улар учун 2,1 млн доллар сарфланган. Солиштириш учун, ўтган йил мос даврида фақат 9 тагина дизел автомашина импорт қилинган.