Ўзбекистон илк бор дунёнинг энг машҳур саёҳат шоуларидан бири — “The Amazing Race”да

2025 йил сентябрь ойида Австралиянинг Network 10 телеканали ва 10 Play стриминг платформасида The Amazing Race Australia шоуcининг янги мавсуми премьераси бўлиб ўтди. Премьера 8 сентябрь куни эфирга узатилди. Ушбу мавсумнинг марказий қисмларидан бири Ўзбекистонда, хусусан Самарқандда ўтказилган суратга олиш ишлари бўлди. Ўйин топшириқлари маҳаллий маданият ва анъаналар асосида ташкил этилган эди.

Ўзбекистон биринчи марта дунёдаги энг машҳур саёҳат шоуларидан бири — “The Amazing Race” дастурида намойиш этилди.

Ўзбекистон эпизодларида “Андижон полькаси”ни ижро этиш, карнай чалиш, анъанавий гиламларни ювиш, қуритилган меваларни ажратиш, анор шарбати тайёрлаш, Туристик Терсак қишлоғида картошка экиш каби вазифалар бўлган.

Дастур намойишининг биринчи ҳафтасидаёқ Австралия ва бутун дунё бўйлаб 1,2 миллион томошабинни жалб қилди. The Amazing Race франшизаси ҳали ҳам ўз обрўсини сақлаб қолган — америкалик версияси 15 марта Emmy мукофотининг “Primetime” номинациясида ғолиб чиққан. 2025 йилда ҳам у яна Outstanding Reality Competition Program номинациясига даъвогар бўлди.

Ўзбекистон эпизодларида бир қатор таниқли австралияликлар иштирок этди:
Айша Скотт, “Below Deck” сериали юлдузи ва унинг турмуш ўртоғи, экстремал спортчи Скотт Добсон;
Брендан Февола, регби афсонаси, қизининг номи Лени;
Дом Ди Томмасо, Red Bull фрираннери ва унинг шериги Маркс Марстерс;
Гретел Киллин, “Big Brother Australia” дастурининг илк бошловчиси ва қизи, медиа-продюсер Эпифани;
Роб Миллс, қўшиқчи ва “Australian Idol” финалчиси, келини — журналист Жоржи Танни билан;
Мелиса Леонг, гастрономик танқидчи, дугонаси Лея билан;
Интернетда машҳур ака-ука блогерлар Лук ва Сесси Скотт;
Линди Рама-Эллис, Индонезия-Австралиялик модель ва тадбиркор, қизи Стелла билан;
Стеф Тисделл, комедиячи ва актриса, акаси — шошилинч тиббий ёрдам шифокори Бен билан.

Иштирокчилар Ўзбекистондаги суратга олиш тажрибасини жуда ижобий баҳолашди. Масалан, комедиячи Стеф Тисделл мамлакатни “бетакрор тажриба” деб атаб, “ажойиб одамлар” ва манзараларнинг “визуал гўзаллиги”ни таъкидлади. Бошқа иштирокчилар ҳам Самарқанддаги меҳмондўстлик ва қулай шароитларни эътироф этишди. Томошабинлар ҳам ушбу эпизодларни илиқ кутиб олиб, Ўзбекистондаги топшириқларни мавсумдаги энг қизиқарли саҳналардан бири сифатида қайд этишди.

Шоу 2025 йил 18 мартдан 25 мартгача давом этган суратга олиш даврида Туризм қўмитаси, Ўзбекистон Ташқи ишлар вазирлиги ва Самарқанд вилояти ҳокимлиги кўмагида Самарқанд ва Ургут туманидаги Терсак қишлоғида ўтказилди. Суратга олиш жараёнини Next Field International (АҚШ) телекомпанияси ташкил қилган.

Next Field International бош директори Станислав Соловкин таъкидлаганидек:

“Шоу нихоятда муваффақиятли бўлди, Ўзбекистоннинг иштироки эса мамлакатнинг халқаро миқёсда танилишига янги йўл очди. Энди кўплаб хорижий продюсерлар Ўзбекистонда суратга олиш имкониятлари билан қизиқишмоқда.”