Ўз айбига иқрор бўлган канадалик қотиллик бўйича судланишдан қутилиб қолди

У Интернет орқали ўлимга олиб келувчи кимёвий модда сотган.

Reuters агентлигининг ёзишича, ​60 ёшли Кеннет Лоу Онтарио Олий судида 16 ёшдан 36 ёшгача бўлган 14 нафар канадаликнинг ўз жонига қасд қилишига кўмаклашганликда айбини тан олди. Шундан сўнг прокуратура унга қўйилган 14 та биринчи даражали қотиллик айбловини олиб ташлашни сўради. Апелляция судининг аввалги прецеденти туфайли бу ҳолатда қотиллик моддаси билан жиноий иш қўзғатиш қонунан имконсиз бўлиб чиқди.

​Кеннет Лоу тўртта компания орқали гўштни консервация қилишда ишлатиладиган, аммо катта миқдорда ўлимга олиб келувчи натрий нитрити тузини ва ўз жонига қасд қилиш учун бошқа анжомларни сотган. 2021 йилдан 2023 йилгача у 41 та давлатга, жумладан, Буюк Британияга 330 та, АҚШга 431 та ва Канадага 157 та жўнатма юборган.

Расмий маълумотларга кўра, у сотган маҳсулотлар оқибатида Буюк Британияда ҳам 79 киши вафот этган, бироқ ҳукумат уни мамлакатга олиб келиб судлашдан воз кечган.

​Бу фаолиятидан Лоу 296 000 канад долларидан (215 000 АҚШ доллари) ортиқ даромад кўрган. У ўз хатида инсонларнинг азобини енгиллаштирмоқчи бўлганини даъво қилган. Лоу 2023 йил май ойидан бери ҳибсда сақланмоқда, унга нисбатан якуний ҳукм шу йилнинг сентябр ойида эълон қилинади. Канада қонунчилигига кўра, ўз жонига қасд қилишга кўмаклашиш моддаси билан 14 йилгача озодликдан маҳрум қилиш жазоси назарда тутилган, дейилади агентлик хабарида.