Муроджон Аҳмадалиевнинг рақиби ростдан ҳам "подарка"миди?

Хабарингиз бор, ҳамюртимиз Муроджон Аҳмадалиев навбатдаги жангини венесуэлалик Эгли Москедага қарши ўтказиб, нокаут эвазига ғалаба қозонди. Ижтимоий тармоқларда эса Москеда кучсиз, ҳеч ким танимайдиган боксчи эканлиги ҳақида турли "комментлар" тарқалди. Биз боксчи ҳақидаги маълумотлар билан қизиқдик.

Москеданинг тўлиқ исми Эгли Ноэль Москеда Санчес бўлиб, ярим енгил ва супер енгил вазн тоифаларида рингга чиқадиган венесуэлалик профессионал боксчи ҳисобланади. 1995 йилда туғилган, бокс оламида "Ла Тормента" (Тўфон) ва "Эль Торпедо" (Торпедо) лақаблари билан танилган.

Москеда фаолиятини 2015 йилда бошлаган, бугунга қадар жами 29 та жанг ўтказиб, 27 тасида ғолиб бўлган (20 та нокаут). Икки бор мағлубиятга учраган.

Москеда ўз фаолиятининг дастлабки йилларида мағлубиятсиз серияни давом эттириб, кучли нокаутчи сифатида ном қозонган. У асосан Жанубий ва Шимолий Америка (АҚШ) ҳудудларидаги жангларда иштирок этган. Бироқ, фаолиятидаги илк мағлубиятини 2024 йил апрель ойида АҚШда мағлубиятсиз кетаётган Феликс Парриллага қарши жангда (очколар ҳисобига кўра) қабул қилиб олган.

Иккинчи мағлубиятини эса Муроджон Аҳмадалиевдан қабул қилиб олди. Муроджон 4-раундда Москедани нокаутга учратди, бу венесуэлалик боксчининг дастлабки нокаутли мағлубияти бўлди.

Хулоса шуки, Муроджон жуда кучли, тажрибали боксчини мағлуб этди. Москедани танимаслигимизга эса унинг Жанубий ва Шимолий Америка (АҚШ) ҳудудларидаги жангларда иштирок этганлиги сабаб, бизнингча.