Улкан хиёнат: Футбол мухлислари ЖЧ-2026 чипталари нархларидан норози

Улар FIFA'ни чипта сотиш сиёсатини қайта кўриб чиқишга чақирмоқда, деб ёзмоқда Euronews.

11 декабр куни 2026 йилги жаҳон чемпионати чипталари нархи маълум бўлгач, футбол мухлислари FIFA'ни “улкан хиёнат”да айблади. FIFA миллий ассоциацияларга ўз жамоаси иштирокидаги ўйинлар учун чипталарнинг 8 фоизини “энг содиқ мухлисларга” сотиш учун ажратади.

Германия Футбол федерацияси томонидан эълон қилинган рўйхатда гуруҳ босқичининг турли ўйинларига чипталар нархи 180 доллардан 700 долларгача белгиланган. Финал чиптасининг энг арзон нархи 4185 долларни, энг қиммат нархи эса 8680 долларни ташкил этади.

Сентябр ойида FIFA сайтида сотиладиган чипталар нархи гуруҳ босқичи ўйинлари учун 60 доллардан финал учун 6730 долларгача бўлиши маълум қилинган эди. Аммо бу нархлар ўзгариши мумкин, чунки футбол бўйича жаҳон чемпионатида биринчи марта динамик нархлар (талабга қараб) қўлланади.

Football Supporters Europe (FSE) мухлислар ташкилоти ҳозирги нархларни "товламачилик" деб атади. FSE FIFA'ни "Жаҳон чемпионатининг анъаналари, универсаллиги ва маданий аҳамиятини ҳурмат қиладиган ечим топилмагунча" миллий ассосиациялар орқали чипта сотишни зудлик билан тўхтатишга чақирди.

2026 йилги жаҳон чемпионати 11 июндан 19 июлгача АҚШ, Канада ва Мексикада ўтказилади. Бу сафарги турнирда илк бор 48 жамоа иштирок этади.