Украина футбол ассоциацияси ФИФА атрофидаги сўнгги жанжалга муносабат билдирди

Украина ФИФА атрофида юзага келган сўнгги жанжалли вазиятга ўз муносабатини билдирди.

Ўтган ҳафтада ФИФА Жаҳон чемпионати ҳуқуқларини хусусий инвесторларга сотиш учун FIFA Forward Enterprise (FFE) деб номланган янги тижорий тузилмани ташкил этишни режалаштираётгани маълум бўлган эди. Бироқ футбол конфедерациялари томонидан билдирилган кескин танқидлар ҳамда УEФА аъзоси бўлган мамлакатлар томонидан ЖЧни бойкот қилиш таҳдидлари фонида Жанни Инфантино бу ғоядан воз кечишга қарор қилди. ФИФА, шунингдек, ушбу режаси учун узр сўради.

УEФА ушбу ташаббусдан воз кечилганини ижобий баҳолади, аммо шу билан бирга ФИФА раҳбариятига бўлган ишонч йўқолганини маълум қилди. Бир қатор футбол ассоциациялари келаси йили бўлиб ўтадиган сайловларда Инфантинонинг қайта сайланишини қўллаб-қувватловчи хатларини қайтариб олди. Европа футбол ассоциациялари иттифоқи (УEФА) ЖЧ бойкоти ғоясидан ҳали бутунлай воз кечгани йўқ.

L’Equipe нашрининг Украина футбол ассоциацияси (УФА)даги манбаларига таяниб хабар беришича, УФА «Жанни Инфантинонинг таклифи ва унинг ФИФАдаги роли бўйича УEФА позициясини тўлиқ қўллаб-қувватлайди».

Шунингдек, УФА «воқеалар ривожидан ва Жаҳон чемпионати ҳуқуқларининг бир қисмини ҳеч қандай муҳокамаларсиз ва шаффофликсиз хусусий инвесторларга сотишни мақсад қилган лойиҳа тақдим этилганидан ҳафсаласи пирга бўлганини» билдирган.