Туркиядаги музокаралар Киев учун тузоққа айланиши мумкин

Владимир Путин ҳақиқатан ҳам Украина ва унинг ғарбий иттифоқчиларининг 30 кунлик оташкесим ҳақидаги таклифига жавоб бериши керак эди, дейди сиёсатшунос Владимир Фесенко. "Аммо бу реакция биз ёки Европа етакчилари учун эмас, балки Доналд Трамп учун. Чунки унинг эътибори учун ўйин бошланди ва Путин учун Трамп билан музокаралар истиқболини сақлаб қолиш жуда муҳим", - дея таъкидлайди эксперт.

Фесенконинг сўзларига кўра, Россия президенти 2022-йилда кенг кўламли босқин бошланганидан сўнг дарҳол музокараларга ишора сифатида Истанбулни атайлаб музокаралар учун таклиф қилган, бу ерда Кремл амалда Украинанинг таслим бўлишини талаб қилган. "Путин мантиғига кўра, бу музокаралар Россия шартлари асосида олиб борилиши кераклигини эслатиши керак", - дейди сиёсатшунос.

Шундай қилиб, Путин Украинани амалда тузоққа илинтирмоқда, чунки у АҚШнинг музокаралари ва ёрдамини рад эта олмайди, дея қайд этади Фесенко. Украиналик экспертларнинг фикрича, расмий Киев вазиятни ўз фойдасига буриш учун ҳамма нарсани қилиши керак. "Биз Истанбулдаги музокаралар форматини кенгайтиришни талаб қилишимиз керак, чунки гап Европа хавфсизлиги ҳақида кетмоқда", - дейди Украина "Меридиан" жамоатчилик тадқиқот маркази директори Дмитрий Левус.

Агар россияликлар Истанбулдаги музокараларда муваффақияцизликка учраса, АҚШ президенти Доналд Трампнинг чекинишга имкони қолмайди, деб ҳисоблайди “Украина Призма” таҳлилий маркази эксперти Александр Краев. "У россияликларга босим ўтказиши керак бўлади, чунки акс ҳолда у заиф кўринади. Ҳозирги босқичда у бу музокаралар бошланишига ва уларнинг муваффақиятига ҳаддан ташқари кўп нарса тикди - ҳам ўз қиёфасида, ҳам ўз сиёсатида, ҳатто иқтисодий жиҳатдан", - деди Краев DW нашрига берган интервюсида.