Трампнинг Эрон ҳақидаги баёнотлари АҚШдаги норозиликлар фонида янгради

АҚШ президенти Дональд Трамп Эрон билан уруш яқин орада тугаши мумкинлиги ҳақидаги аввалги баёнотларини такрорлади. У Вашингтон Теҳроннинг ядровий технологияларга эга бўлишининг олдини олишини таъкидлади.

Эроннинг «Тасним» ахборот агентлиги хабар беришича, Трамп ўз нутқида АҚШнинг ҳолати жуда яхши эканини айтган. Бироқ мамлакатда ёқилғи нархларининг ошиши ва аҳолига тушаётган молиявий босим юзасидан хавотирлар кучайгани қайд этилган.

Агентлик талқинига кўра, иқтисодий муаммолар ва жамоатчиликдаги норозиликлар Трамп ҳамда унинг партияси нуфузига салбий таъсир кўрсатмоқда.

Трампнинг Жоржиядаги нутқи норозилик билан бўлинди

Хабарда айтилишича, Трампнинг Жоржия штатидаги сайловолди митингида иштирокчилардан бирининг норозилик бақириқлари унинг нутқини қисқа вақтга тўхтатиб қўйган.

Эслатиб ўтамиз, Трамп Эроннинг ядровий дастурига қарши қатъий позицияни илгари суриб келади. Бироқ унинг урушнинг яқин орада тугаши ҳақидаги баёнотлари ва АҚШнинг иқтисодий аҳволига доир фикрлари бўйича турли қарашлар мавжуд.