Эрон Нетаньяҳунинг таҳдидларига жавобан Исроилга «якунланмаган ишлар» борлигини эслатди.

Эрон ташқи ишлар вазири Аббос Ароқчининг таъкидлашича, Теҳрон ва Исроил ўртасида ҳали «якунланмаган ишлар» бор. У бу ҳақда Исроил Бош вазири Биньямин Нетаньяҳунинг Эрон билан қарама-қаршиликда «ишни охирига етказиш» зарурлиги ҳақидаги баёнотларига жавобан маълум қилди.

«Сиз охирги марта “ишни якунлаш”ни истаганингизда, Эрон аввалгидан ҳам кучлироқ бўлди. Яна омадингизни синаб кўрмоқчимисиз? Марҳамат, аммо эҳтиёт бўлинг — бизнинг ҳам ҳали якунланмаган ишларимиз бор», — деб ёзди Ароқчи X ижтимоий тармоғида.

Эрон ташқи ишлар вазири, шунингдек, Нетаньяҳуни ўзининг ички сиёсий ва суд билан боғлиқ муаммоларидан эътиборни чалғитиш мақсадида АҚШни янги ҳарбий можарога жалб этишга уринишда айблади.