Трамп тинчликка чақириганига қарамай, Таиланд Камбоджадаги ҳарбий объектларни бомбардимон қилишни давом эттирмоқда

Камбоджа Мудофаа вазирлиги маълумотига кўра, Таиланд қўшинлари ҳали бомбардимонларни тўхтатгани йўқ.

Ўз навбатида, Таиланд бош вазири Анутин Чарнвиракул АҚШ президенти Доналд Трамп билан бўлиб ўтган суҳбатдан сўнг Бангкокда журналистларга чегара можаросида ҳеч қандай сулҳга эришилмаганини, Камбоджа биринчи бўлиб ўт очишни тўхтатиши кераклигини айтди.

Унинг таъкидлашича, айнан Камбоджа ўт очишни тўхтатиш бўйича келишувни биринчи бўлиб бузган.

8 декабр куни Таиланд ва Камбоджа ўртасидаги чегара можароси қайта бошланган эди. Таиланд армияси Камбоджанинг бир неча ҳудудларидаги ҳарбий объектларга ҳаво зарбалари берган. Ҳар икки давлат бир-бирини сулҳни бузишда айблаганди.

12 декабр куни Доналд Трамп Таиланд ва Камбоджа бош вазирлари билан телефон орқали суҳбатлашганидан сўнг улар жанговар ҳаракатларни тўхтатишга рози бўлганини маълум қилган эди.

Таиланд ва Камбоджа ўртасида тахминан 100 йилдан бери давом этаётган ушбу можародаги аввалги кескинлашув шу йилнинг ёзида юз берганди. Октябр охирида Таиланд ва Камбоджа АҚШ воситачилигида узоқ муддатли тинчликни таъминлашга қаратилган тинчлик битимини имзолаганди.