Трамп Россиянинг Суми шаҳрига уюштирган ракета зарбасини "даҳшатли воқеа" деб атади

"Менимча, бу даҳшатли воқеа, менга улар хато қилганини айтишди. Аммо мен бу ҳодисани даҳшатли деб ҳисоблайман. Менимча, бу урушнинг ўзи — даҳшатли", — деди АҚШ президенти журналистларнинг саволларига жавоб берар экан.

"Мен президент бўлганимда Қўшма Штатлар мазкур урушнинг бошланишига йўл қўймаган бўлар эди. Бу уруш — АҚШ учун шармандалик. Миллионлаб одамлар ҳалок бўлди, улар яшаши керак эди. Бутун Украина бўйлаб шаҳарлар вайрон бўлмоқда", — дея қўшимча қилди президент.

Шунингдек, Трамп Байденни танқид қилди ҳамда у "урушнинг бошланишига йўл қўйганини" айтиб ўтди.

"Бу — Байденнинг уруши. Бу менинг урушим эмас. Уруш Байден даврида бошланди. У Украинага миллиардлаб долларларни берди. Агар Байденнинг миясини бир қисми ишлаганида, у бунга ҳеч қачон рози бўлмасди. Мен эса ҳеч қачон бунга йўл қўймасдим. Мен ушбу можарони тўхтатишга ҳаракат қиляпман, шунда биз кўплаб инсонларни ҳаётини сақлаб қолишимиз мумкин", — дея таъкидлади Трамп.