Трамп: "Россияга қарши санкциялар Украина билан боғлиқ вазиятга таъсир қилмаслиги мумкин"

Америка маъмурияти 10 кунлик муддатдан сўнг Россияга қарши санкциялар қўллаш ниятида, аммо бу Украинадаги инқирозни ҳал қилиш билан боғлиқ вазиятга сезиларли таъсир кўрсатмаслиги мумкин.

Бу ҳақда АҚШ президенти Дональд Трамп Оқ уйда журналистлар билан суҳбат чоғида айтиб ўтди.

"Биз санкциялар қўллаймиз. Россия президенти Владимир Путин санкциялардан хавотирдами ёки йўқми, билмайман. Биласизми, улар санкциялар ҳақида билишади. Мен санцсиялар, божлар ва бошқа ҳамма нарсани ҳаммадан кўра яхши биламан. Бу қандайдир самара берадими, билмайман, лекин биз буни қиламиз", - деди у.

"Аммо бу ҳеч қачон бошланмаслиги керак бўлган уруш. Агар мен президент бўлганимда бу уруш бошланмаган бўларди ва бу АҚШнинг аввалги президенти Жо Байденнинг уруши. Иштирок этмаслиги керак бўлган аҳмоқона уруш", - дея қўшимча қилди Америка раҳбари.

Трамп аввалроқ Россия ва Украинага келишувга эришиш учун 50 кун беришини, шундан сўнг Москва ва унинг савдо ҳамкорларига 100 фоизлик божлар жорий этиши ҳақида огоҳлантирган эди. 29 июль куни у Россия ва келишувдаги тараққиётдан ҳафсаласи пир бўлганини ва шунинг учун муддатни 10 кунгача қисқартираётганини айтди. АҚШнинг БМТдаги муваққат ишлар вакили ўринбосари Жон Келлининг 31 июль куни маълум қилишича, Трамп Россия ва Украина 8 августгача тинчлик йўли билан келишувга эришиши керак, деб ҳисоблайди. Россия президенти матбуот котиби Дмитрий Песков Кремль Америка етакчисининг баёнотини ўқиб чиқиб, уни ҳисобга олганини айтди.