Трамп: "Россия йил бошидан бери 112 мингдан ортиқ аскари, Украина эса 8 минг аскарини йўқотди"

Жорий йил бошидан бери Россия Украина билан урушда 112 мингдан ортиқ аскарини йўқотди, Украина эса 8 мингга яқин аскарини йўқотди.

Бу ҳақда АҚШ президенти Дональд Truth Social ижтимоий тармоғидаги саҳифасида ёзди.

Трампнинг қайд этишича, биргина шу ойда Украина билан урушда қарийб 20 минг россиялик аскар ҳалок бўлган.

"Менга ҳозиргина шу ойда Украина билан урушда қарийб 20 минг россиялик аскарлар ҳалок бўлгани ҳақида хабар беришди. Йил бошидан бери Россия 112,5 минг аскарини йўқотди. Бу жуда кўп кераксиз ўлим! Украина ҳам жуда кўп жабр кўрди. 2025 йилнинг 1 январидан бери улар 8 мингга яқин аскарини йўқотди, бунга бедарак йўқолганлар киритилмаган" - деди АҚШ етакчиси.

Шунингдек, у Украинада тинч аҳоли ҳам ҳалок бўлаётганини таъкидлади, чунки Россия Киев ва Украинанинг бошқа аҳоли пунктларини ўққа тутишда давом этмоқда. "Бу ҳеч қачон содир бўлмаслиги керак бўлган уруш - бу ТРАМПнинг эмас, Байденнинг уруши. Мен буни тўхтата оламанми ёки йўқлигини билиш учун келдим!" - деб ёзди.