Трамп қарор қилди: америкалик тадбиркорларга пора беришга рухсат берилди

АҚШ президенти Доналд Трамп ижро фармонини имзолади, бу фармонга кўра АҚШ бош прокурори Пем Бондига 1977 йилда қабул қилинган "Чет элдаги коррупция амалиёти тўғрисида"ги қонун (Foreign Corrupt Practices Act, FCPA) ижросини тўхтатиб қўйиш ҳуқуқи берилди.

Бу ҳақда Financial Times хабар бермоқда.

Мазкур қонун Америка компаниялари ва фуқароларига хорижда ўз бизнес манфаатларини илгари суриш мақсадида чет эллик амалдорларга пора беришни тақиқлайди.

Трампнинг фикрича, FCPA'нинг қўлланилишини тўхтатиш "Америка учун каттароқ бизнес имкониятларини" яратади. Оқ уй раҳбарининг таъкидлашича, бошқа мамлакатларда бизнес юритаётган америкаликлар кўпинча асоссиз тергов ва айбловларга дуч келишади, шу сабабли компаниялар америкаликлар билан ҳамкорлик қилишдан ўзларини олиб қочмоқда.

Оқ уй вакилларининг айтишича, мамлакатнинг миллий хавфсизлиги Америка компанияларининг жаҳон бозорида стратегик устунликка эга бўла олишига боғлиқ. Улар, шунингдек, FCPA'ни ҳаддан ташқари қўллашдан воз кечиш Америка компанияларига халқаро майдонда рақобатбардошлигини ошириш имконини беришини таъкидладилар.

Бироқ, коррупцияга қарши кураш бўйича мутахассислар ФCПАнинг бекор қилиниши хорижда фаолият юритаётган Америка компанияларига салбий таъсир кўрсатиши ҳақида огоҳлантирмоқда.

Чет элдаги коррупция тўғрисидаги қонун (Foreign Corrupt Practices Act) 1977 йилдаёқ қабул қилинган эди. У нафақат пора бериш фактини, балки пора беришни режалаштириш ва таклиф қилишни, шунингдек, бу ҳаракатни компания раҳбарияти билан келишишни ҳам жазолайдиган қоидаларни ўз ичига олади. Қонунни бузганлик учун озодликдан маҳрум қилишнинг энг узоқ муддати 15 йил, энг юқори жарима миқдори эса 250 минг долларни ташкил этади. 2024 йилда қонун 24 та ҳолатда, 2023 йилда эса 17 та ҳолатда қўлланилган.