Трамп "оиласи"да катта жанжал

Трамп "оиласи"да катта жанжал.

Яқинда хабар қилинганидек, Оқ уйда Доналд Трамп ҳукуматининг "портловчи" йиғилиши бўлиб ўтди. Унда АҚШ давлат котиби Марко Рубио ва транспорт вазири Шон Даффи ҳукумат самарадорлиги департаменти раҳбари, миллиардер Илон Маск билан қизғин баҳсга киришди.

Оқ уйда авж олган жанжал тафсилотларини The New York Times нашри тўплади.

Нашр воқеалардан хабардор бешта манбага таяниб ёзишича, йиғилишда Маск Рубиони ўз департаменти ходимларини қисқартира олмаганликда айблаган. Таъкидланишича, Рубио бир неча ҳафтадан бери Маскка нисбатан ғазабда эди, чунки унинг жамоаси Халқаро тараққиёт агентлигини (USAID) амалда ёпиб қўйган эди. У ниҳоят ҳукуматнинг ушбу йиғилишида ўз фикрини айтишга муваффақ бўлди.

Рубионинг айтишича, Маск хато қилмоқда, чунки у ўз ҳисобидан муддатидан олдин нафақага чиққан 1500 дан ортиқ Давлат департаменти амалдорларини ҳисобга олмаяпти. У "киноя билан" Маскдан сўради: "Наҳотки, сиз Рубиога бу одамларнинг барчасини қайтадан ишга олиб, кейин уларни яна ишдан бўшатиш томошасини уюштириш имкониятини бермоқчисиз?" Шундан сўнг, у Давлат департаментини қайта ташкил этиш бўйича ўзининг батафсил режаларини баён қилди.

Бунга жавобан Маск Рубиога, у "телевидениеда яхши кўриниши"ни, яъни бошқа ҳеч нарсага қодир эмаслигини айтди.

Бу вақт мобайнида Трамп стул суянчиғига суяниб, қўлларини қовуштириб ўтирарди. Тортишув узоқ давом этгач, Трамп "ажойиб иш" қилаётган Рубиони ҳимоя қилиш учун суҳбатга аралашди. Трампнинг айтишича, Рубио жуда банд, у доимий равишда саёҳат қилади ва телевидениеда чиқишлар қилади, унинг бошқариши лозим бўлган агентлиги ҳам бор.

Маск бошқа бир қанча амалдорлар билан ҳам келишмовчиликларга борди. Транспорт вазири Шон Даффи Федерал авиация бошқармаси ходимларининг қисқартирилишидан шикоят қилди. Унинг айтишича, "Маск жамоасининг ёш ходимлари ҳаво ҳаракати диспетчерларини ишдан бўшатишга уринмоқда." Маск вазирнинг сўзларини ёлғон деб атади, Даффи ҳам унга худди шундай жавоб қайтарди.

Таъкидланишича, амалдорлар Илон Маск нима қилмоқчи эканини - ҳукуматдаги исрофгарчилик, фирибгарлик ва суиистеъмолларни камайтириш ғоясини деярли бир овоздан маъқулламоқда. Бироқ улар ҳукуматни ислоҳ қилишда кескин ёндашувдан ва ҳаракатларни изчил мувофиқлаштириш йўқлигидан кўнгли қолган.

Чоршанба куни кечқурун кутилмаганда эълон қилинган пайшанба кунги учрашув Трампнинг кўплаб шикоятларни эътиборга олганининг белгиси бўлди. У ҳар икки томонга ҳам нимадир таклиф қилишга интилди, ҳам Маскни, ҳам унинг вазирларини мақтади. Трамп Маскнинг ташаббуси миссиясини ҳамон қўллаб-қувватлаётганини аниқ-равшан айтди.

Бироқ, унинг айтишича, энди ёндашувни бироз такомиллаштириш вақти келди. NYT манбаларининг хабар беришича, Президент ўз вазирларини ҳукумат ходимларини қисқартириш учун масъул этиб тайинлаган, Маск жамоасига эса фақат маслаҳатчи вазифасини юклаб қўйган. Трамп учрашувдан сўнг ижтимоий тармоқларда ёзган хабарида ходимларни қисқартириш режасининг кейинги босқичи "болта" билан эмас, "жарроҳ пичоғи" билан амалга оширилишини таъкидлаган.

Пайшанба кунги йиғилишга одатдаги футболкаси ўрнига костюм-галстукда келган Маск, Трамп уни тартибсиз кўриниши учун оммавий танқид қилганидан кейин, ўзини ҳимоя қилиб, ўнлаб миллиард доллар бозор қийматига эга учта компанияси борлигини ва уларнинг фаолияти натижалари ўз-ўзидан кўриниб турганини айтган.