Трамп Миср Президентини АҚШга таклиф қилди

Бугун, 1 февраль куни Миср Президенти Абдулфаттоҳ ас-Сиси ва АҚШ Президенти Дональд Трамп телефон орқали мулоқот ўтказди ва Трамп ас-Сисини расмий ташриф билан Вашингтонга таклиф қилди. Бу ҳақда Миср етакчисининг матбуот хизмати хабар берди.

“Трамп президентга очиқ таклиф йўллаб, уни Вашингтонга ташриф буюриб, Оқ уйда учрашишга чорлади”, дейилади баёнотда.

Ўз навбатида, ас-Сиси ҳам Трампни Мисрга ташриф буюришга таклиф қилиб, бу ташриф стратегик ҳамкорликни мустаҳкамлаш ва Яқин Шарқдаги инқироз ҳамда муаммоларни муҳокама қилишга хизмат қилишини таъкидлаган. Шунингдек, у АҚШ Президентига янги Миср музейининг очилиш маросимида иштирок этишни таклиф қилган.

“Иккала Президент ҳам Яқин Шарқда тинчлик ва барқарорликка эришишга бўлган қизиқишини билдирди”, дейилади баёнотда.

Миср етакчиси минтақада барқарор тинчлик ўрнатиш муҳимлигини таъкидлаб, халқаро ҳамжамият Президент Трампнинг узоқ йиллик низоларни якунловчи доимий ва тарихий тинчлик келишувига эришиш қобилиятига умид боғлаётганини қайд этган.

Шунингдек, томонлар икки томонлама, минтақавий ва халқаро масалалар, давлатлар ўртасидаги иқтисодий ва инвестицион алоқаларни мустаҳкамлаш ҳамда сув хавфсизлиги соҳасидаги ҳамкорлик муҳокама қилинганини билдирган. Суҳбат АҚШ томонининг ташаббуси билан бўлиб ўтган.