Трамп Ҳиндистонни Россия нефтини импорт қилишни қисқартиришга мажбурламоқда

Дональд Трамп Нью-Дели Россия нефтини харид қилишни қисқартирмагунча Ҳиндистон билан савдо келишувини тасдиқламаслигини маълум қилди.

АҚШ президенти Дональд Трамп ўз жамоаси томонидан таклиф қилинган Ҳиндистон билан савдо келишувини тасдиқлашдан бош тортди. The Washington Post маълумотига кўра, америкалик раҳбар ҳужжатни имзолашни Россия нефтини импорт қилишни камайтириш билан боғлади.

Газета ёзишича, яқинда АҚШ Давлат котиби Марко Рубио ва савдо вакили Джеймисон Грир Трампга янги келишув лойиҳасини тақдим этишган. У Ҳиндистоннинг АҚШ товарларига солинадиган божларини сезиларли даражада камайтиришни кўзда тутади. Аммо президент Нью-Делининг Россиядан сотиб олишни камайтиришга розилик бергунга қадар уни маъқулламайди.

Манбалар таъкидлашича, АҚШ ва Ҳиндистон муносабатлари сўнгги ўн йилликлардаги энг пас даражада. Вазиятни янада мураккаблаштиргани – Оқ уйнинг савдо маслаҳатчиси Питер Наварронинг яқиндаги баёнотлари бўлиб, у Ҳиндистонни Россия нефтини харид қилиши орқали Украинадаги ҳарбий ҳаракатларни билвосита қўллаб-қувватлашда айблади.

Трамп маъмурияти Наварронинг изоҳларини «самарасиз» деб баҳолаган, чунки у музокараларда тўғридан-тўғри иштирок этмайди. Шунга қарамай, Давлат департаменти вазиятни барқарорлаштиришга уринишга буйруқ олган.

The Washington Post манбаларига кўра, Оқ уй савдо ва Россия нефтини алоҳида масала сифатида қарамоқда, аммо «давом этаётган харидлар ёрдам бермаяпти».

Трамп қайтадан Оқ уйга келгандан кейин АҚШ Ҳиндистондан импортга божларни кескин оширди. Август охирида божлар 25% га ўсиб, 50% гача етди ва бу дунёдаги энг юқори кўрсаткичлардан бирига айланди. Трамп буни Ҳиндистон «тўғридан-тўғри ёки билвосита» Россия нефтини импорт қилаётгани билан изоҳлади.

Нью-Дели бундай чораларни адолатсиз деб атади.

«Вашингтоннинг бу ҳаракатлари асосланмаган», — деди Ҳиндистон Ташқи ишлар вазирлигининг расмий вакили Рандҳир Жайсвал.

Нефть ва табиий газ вазири Хардип Пури эса Россия нефти етказиб беришлари дунё иқтисодиётини нарх шокидан ҳимоя қилганини таъкидлади: «Бу етказиб беришлар бўлмаганида баррели $200 гача етар эди». У барча Ҳиндистон келишувлари халқаро қоидаларга мувофиқ амалга оширилишини қўшимча қилди.