Трамп Дания бош вазири билан агрессив оҳангда суҳбат ўтказди — Financial Times

Нашрнинг хабарига кўра, АҚШ президенти Дания бош вазири Метте Фредериксен билан ўтказилган телефон мулоқотида Гренландияни сотиб олиш нияти жиддий эканини билдирган. Дания ҳукумати раҳбари бунга жавобан гарчи Вашингтон томонидан "кучли қизиқиш" бўлса ҳам, оролни сотиш имконсизлигини айтган.

"Ушбу қўнғироқ ҳақида хабардор бўлган Европа Иттифоқининг беш нафар амалдаги ва собиқ юқори мартабали амалдорлари суҳбат жуда ёмон оҳангда ўтганини айтишди. Фредериксен АҚШ билан ҳамкорликни кучайтиришга тайёрлигини билдирганига қарамай, Доналд Трамп ўта ёмон кайфиятда бўлган ва ўзини агрессив тутган", деб ёзади Financial Times.

Нашрнинг тахмин қилишича, Трамп ва Фредериксен ўртасидаги суҳбат тафсилотлари "Трампнинг ҳокимиятга қайтиши трансатлантик муносабатлардаги тарангликни ҳар қачонгидан ҳам кучайтириши мумкин", деган хавотирларни оширади.

АҚШ президенти Дания Гренландияни сотишдан бош тортса, мамлакатга қарши махсус чоралар, масалан, айрим маҳсулотларга оширилган божлар жорий қилиш билан таҳдид қилган.