Трамп Бутун Европага дахлдор «катта келишув»ни эълон қилдими?

АҚШ президенти Дональд Трамп Оқ уйда журналистлар билан суҳбатда Украинадаги низони ҳал қилиш бўйича «катта ва гўзал келишув» тайёрланаётганини ва у нафақат Украинага, балки бутун Европага дахлдор бўлиши мумкинлигини билдирди.

Трамп Вашингтонда Кремль вакили Кирилл Дмитриев билан ўтказилган учрашувни тасдиқлаган бўлса-да, музокаралар тафсилотларини ошкор қилишдан бош тортди. «Бу жуда катта келишув бўлади. У нафақат Украинани, балки, эҳтимол, бутун Европани қамраб олади», — деди у ва якуний натижадан «барча томонлар мамнун бўлишини» қўшимча қилди.

Бир кун аввал АҚШнинг биринчи хоними Мелания Трамп Оқ уйда Россия ва Украина вакиллари — Россия президентининг махсус вакили Кирилл Дмитриев, инсон ҳуқуқлари бўйича вакили Яна Лантратова ҳамда Украина парламентининг «Халқ хизматчиси» фракцияси раҳбари Давид Арахамия ва инсон ҳуқуқлари бўйича вакили Дмитрий Лубинец билан учрашган эди.

BILD ва AP манбаларига кўра, учрашув Херсон вилоятининг Россия томонидан эгалланган Олешки шаҳрида инсонпарварлик ёрдамини етказиш ва аҳолини эвакуация қилиш учун вақтинчалик ўт очишни тўхтатишга бағишланган. Бу келишувда Мелания Трамп бевосита воситачи (персонал воситачи) сифатида иштирок этган.

Келаси ҳафтада Абу-Дабида Россия, Украина ва АҚШ вакилларининг уч томонлама музокаралари ўтказилиши режалаштирилган. Бироқ бу музокараларнинг Трамп томонидан эълон қилинган кенг кўламли келишувга қанчалик алоқадорлиги ҳозирча аниқ айтилмаган.