Трамп АҚШ Миллий разведкаси директори лавозимини ипотека агентлиги раҳбарига топширди

АҚШ президенти Доналд Трамп Миллий разведка директори вазифасини вақтинча кўчмас мулк соҳасидаги тадбиркор Билл Пултега топширди. Бу ҳақда Трамп ўзининг Truth Social тармоғида маълум қилди. Трамп ўз платформасида Билл Пулте мамлакатнинг энг нозик масалаларини ҳал этиш, молия бозорларининг хавфсизлиги ва барқарорлигини таъминлаш ҳамда Fannie Mae ва Freddie Mac тизимларидаги 10 триллион доллардан ортиқ активларни бошқариш бўйича катта тажрибага эга эканини таъкидлади.

38 ёшли Пулте аввал махсус хизматлар ёки разведка тизимида ишламаган. Шунга қарамай, у доимий раҳбар тайинлангунига қадар Қўшма Штатларнинг 18 та разведка идораси фаолиятини мувофиқлаштириб туради.

Трампнинг маълум қилишича, Пулте аввалги лавозимларини ҳам сақлаб қолади. У Трамп Оқ уйга қайтганидан кейин 2008 йилги ипотека инқирозидан сўнг ташкил этилган Федерал уй-жой молиялаштириш агентлиги директори этиб тайинланган эди. Шунингдек, у давлат ипотека агентликлари — Fannie Mae ва Freddie Mac’га ҳам раҳбарлик қилмоқда.

АҚШ Миллий разведкасининг амалдаги раҳбари Тулси Габбард эрига суяк саратонининг жуда кам учрайдиган тури ташхиси қўйилганидан кейин, президент Доналд Трампга 30 июн куни лавозимини тарк этишини маълум қилганди.