Тошкентда 59 та уй-жой қурилиши тўхтатилди. Нега?

Тошкентда ҳужжатлари тўлиқ бўлмаган 59 та уй-жой қурилиши тўхтатилди, объектлар электр таъминотидан узиб қўйилди. Чунки зарур рухсат берувчи ҳужжатлар, экспертиза хулосалари ва техник маълумотномаларни олмасдан қурилишни бошлаб, фуқароларга ноқонуний равишда уй-жой сотишга уринилган.
Натижада айрим фуқаролар уй-жойсиз қолмоқда.

Тошкент ҳокимлиги пойтахт аҳолисига мурожаат қиларкан, уй-жой харид қилишда ниҳоятда эҳтиёткор бўлиш ва қуйидагиларга амал қилишга чақирди:
- сотиб олаётган кўчмас мулкка оид барча ҳужжатларнинг асл нусхаларини (кадастр, экспертиза хулосалари ва кенгаш қарорлари, техник кўрик далолатномаси) талаб қилиш ва уларни синчковлик билан текшириш;
- сотувчиларга пулни нақд ёки норасмий йўллар билан бермаслик, шартноманинг барча бандларини диққат билан ўрганиб чиқиш;
- қурувчи ёки обектнинг қонунийлиги хусусида озгина шубҳа туғилса, шунингдек, компания ҳужжатларни тақдим этишни пайсалга солса, Тошкент шаҳар ҳокимлигининг расмий ботига мурожаат этиш. Шунда обектнинг қонуний мақоми ҳақида маълумот берилади.