Тошкент аэропортида шамол йўналишининг ўзгариши сабаб бир нечта самолётлар қўна олмади

Тошкент халқаро аэропортида шамол йўналишининг кескин ўзгариши туфайли маҳаллий вақт билан соат 16:03 да ҳаво кемаларини қабул қилиш ва жўнатиш бўйича вақтинчалик чекловлар жорий этилди. Бу сабабли қуйидаги рейслар қўна олмади:

• "Қанот Шарқ" авиакомпаниясининг Камран – Тошкент йўналишидаги HH-2232 рейси (қўниш вақти 16:35);

• "Uzbekistan Airways" авиакомпаниясининг Махачқала – Тошкент йўналишидаги HY-9732 рейси (қўниш вақти 16:42);

• "Uzbekistan Airways" авиакомпаниясининг Деҳли – Тошкент йўналишидаги HY-424 рейси (қўниш вақти 16:51) Самарқанддаги захира аэродромга йўналтирилди.

Шунингдек, "Air Astana" авиакомпаниясининг Астана – Тошкент йўналишидаги KS-123 рейси Туркистондаги захира аэродромга қўнишга қарор қилди.

Маҳаллий вақт билан соат 16:30 да вазият барқарорлашди, аэропортда ҳаво қатнови қайта тикланди. Ҳозирда аэропорт одатдаги тартибда ишламоқда. Захира аэродромларга қўнган самолётлар Тошкентга қайта учиш учун тайёрланмоқда.

🌀 Эслатиб ўтамиз: шамол силишуви — бу қисқа масофа ичида шамолнинг йўналиши ёки тезлигининг кескин ўзгариши ҳолатидир. У горизонтал ёки вертикал бўлиши мумкин ва самолётларга парвоз, кўтарилиш ёки қўниш пайтида сезиларли таъсир кўрсатади.