The Atlantic бош муҳаррири АҚШ маъмурияти аъзоларининг Signal даги чатига тасодифан қўшилган — Тhe Guardian

Муҳаррир Жеффри Голдберг Қўшма Штатлар президенти Доналд Трамп жамоаси Ямандаги ҳусийларга қарши зарбаларни муҳокама қилган Signal мессенжеридаги гуруҳли чатга тасодифан қўшилган, деб ёзмоқда нашр.

Тhe Guardian манбаларига кўра, АҚШ президентининг Миллий хавфсизлик бўйича маслаҳатчи Майк Уолцнинг iPhone'да контактлар хатолик билан сақлангани сабабли шундай ҳодиса содир бўлган.

Оқ уйда ўтказилган ички тергов натижасида аниқланишича, 2024 йил октябр ойида Голдберг Трампнинг сайловолди штабига электрон почта юборган. Бу хат ўша пайтдаги матбуот котиби Браян Ҳьюзга юборилган ва у ундаги матнни, шу жумладан Голдбергнинг телефон рақами кўрсатилган имзо қисмини, нусхалаб Майк Уолцга юборган. Тhe Guardian манбаларига кўра, Уолц Голдбергга қўнғироқ қилмаган, лекин унинг рақамини айфонида тасодифан Ҳьюз номи билан сақлаб қўйган.

Жеффри Голдберг Сигналъдаги чатдан Трамп жамоаси аъзоларининг ёзишмаларини ошкор қилгач, Майк Уолц чатни ўзи яратганини тан олган, лекин Голдбергнинг рақами қандай қилиб унда пайдо бўлганини билмаслигини айтганди.

Politico'га кўра, Трампнинг атрофидагилар Уолцни ишдан бўшатишни маслаҳат беришган. Президент эса маслаҳатчиси “катта хатога йўл қўйганини” тан олган бўлса-да, либерал ОАВ буни “ғалаба” сифатида баҳоламаслиги учун уни ишдан бўшатмасликка қарор қилган.