Tesla компаниясининг эълон қилинган ҳисоботларига кўра, сўнгги чоракда соф фойда 71% га камайиб, 2,3 миллиард долларни ташкил этди. Ушбу натижалар ошкор қилингач, компания акциялари биржа савдосидан ташқарида тахминан 3% га тушиб кетди. Мутахассислар буни АҚШ ва Европадаги электромобилларга бўлган талабнинг пасайиши билан боғлашмоқда: Tesla тарихида илк бор сотув ҳажми камайиб, 1,79 миллион автомобилни ташкил этди, бу эса 2023 йилга нисбатан 19 минг донага камдир.
Бундан ташқари, компания обрўсига зарар етказувчи омиллар ҳам мавжуд. Илон Маскнинг сиёсий баёнотлари айрим мижозларнинг Tesla автомобилларига бўлган қизиқишини камайтирган. Ҳатто баъзи харидорлар буюртмаларидан воз кечаётгани айтилмоқда. Шунингдек, катта реклама билан тақдим этилган Cybertruck пикапи кутилган натижани бермади ва кенг оммага ёқмай қолди.
Шунга қарамай, Tesla янги моделлар ёрдамида вазиятни ўнглашга умид қилмоқда. Март ойида компания янгиланган Model Y автомобилини тақдим этади, унинг янгиланган комплектациядаги нархи 60 990 еврони ташкил этади. Маск, шунингдек, автоном бошқарув технологиясига катта умид боғламоқда: июнь ойидан бошлаб Техас штатининг Остин шаҳрида ҳайдовчисиз такси хизмати йўлга қўйилади, 2026 йилгача эса бу хизмат кенг миқёсда жорий этилиши режалаштирилган.
Илон Маск эса Tesla автомобиллар учун сунъий интеллект соҳасида етакчи эканини таъкидлаб, шундай деди: «Бу йўналишда биздан олдинда бораётган ҳеч қандай компания йўқ».
Озод этилган исроиллик асирнинг сўзлари кўпчиликни ҳайратлантирди: "Сафингизда бўлишни истардим"
Зеленский президентликдан кетиш шартини айтди
Мексикадаги қирғоқлардан бирида ноёб “қиёмат балиқлари” топилди
