Темир йўл ҳалокати: Испанияда уч кунлик мотам эълон қилинди

Испанияда камида 68 кишининг умрига зомин бўлган темир йўл ҳалокати муносабати билан уч кунлик мотам эълон қилинди.

Испания транспорт вазири Оскар Пуэнте Толедо провинциясида Renfe ва Iryo тезюрар поездларининг тўқнашуви автоматик бошқарув тизимидаги узилиш сабабли юз берганини маълум қилди. Вазирнинг сўзларига кўра, диспетчерлик маркази дастлаб ушбу участкада барча поездлар ҳаракатини тўхтатган, бироқ кейинчалик ҳаракатни қайта тиклаш бўйича «тушунтириб бўлмайдиган» қарор қабул қилган, бу эса фожиага олиб келган.

Қўшни Урда шаҳарчасидаги мактабда яқинларининг тақдири ҳақида маълумот олишни истаган оила аъзолари учун махсус ёрдам маркази ташкил этилди. AFP хабарига кўра, Қизил Хоч ходимлари воқеа жойига келаётган фуқароларга руҳий ва амалий ёрдам кўрсатмоқда. Бино атрофида полиция ходимлари ва журналистлар тўпланган.

Шу билан бирга, поездлар тўқнашган ҳудудда қидирув-қутқарув ишлари узлуксиз давом этмоқда. dpa агентлигининг билдиришича, издан чиқиб кетган вагонларни кўздан кечириш ва тозалаш учун тунда учта оғир кран жалб қилинган.

Бу Испанияда йил бошидан бери юз берган иккинчи одам ўлими билан боғлиқ йирик темир йўл ҳалокатидир. Жорий йилнинг январь ойида Андалусияда содир бўлган поездлар тўқнашуви оқибатида 46 киши ҳалок бўлган эди.