Мусобақа Ўзбекистон Президенти Шавкат Мирзиёев томонидан ўзбек миллий курашини оммалаштириш, унинг жаҳон спорти дурдонасига айланишига ва ёзги Олимпия ўйинлари дастурига киритилишига эришиш бўйича ташаббус ва қарорларининг ижросини рўёбга чиқариш мақсадида ташкил этилди.
Халқаро Кураш ассоциацияси администрацияси раҳбари Мансур Мирзаев ва Осиё-Океания кураш конфедерация президенти Комил Рўзиев турнирнинг очилиш маросимидаги нутқида, Ўзбекистон Президенти раҳнамолигида ўзбек курашини халқаро майдонда янада оммалаштириш ва қитъа ҳамда жаҳон биринчиликларини мунтазам ўтказиш бўйича улкан ишлар амалга оширилганини таъкидладилар.
Қайд этилганидек, сўнгги йилларда кураш халқаро спорт тури сифатида кенг эътироф этилмоқда, «кураш», «ҳалол», «таъзим», «тўхта» ва «ёнбош» каби ўзбекона атамалар эса халқаро спорт луғати таркибидан мустаҳкам ўрин эгаллади.
Теҳронда бўлиб ўтган Осиё чемпионатида 20 тадан ортиқ давлатдан 200 нафардан зиёд полвонлар бел олишди.
Мусобақада Ўзбекистон терма жамоаси аъзолари умумжамоа ҳисобида 1-ўринни эгаллади. Жумладан, Ўзбекистон эркаклар жамоаси 5 та олтин, 1 кумуш 1 бронза медални қўлга киритди. Ўзбекистон аёллар терма жамоаси вакилалари ҳам 3 та олтин ва 4 та кумуш медаль билан умумжамоа ҳисобида биринчи ўринни банд этишди.
Хусусан, эркаклар баҳсида Муродил Муродиллаев (- 60 кг), Отабек Ҳасанов (-66 кг), Арслонбек Тожиев (-81 кг), Умар Бозоров (-90 кг) ва Шермуҳаммад Жандриев (-100 кг), аёллар курашида Ҳилола Ортиқбоева (52 кг), Шаҳноза Бозорова (- 70 кг), Покизахон Камолиддинова (- 87 кг) ўз вазн тоифаларида Осиё чемпионлигини тантана қилдилар.