Тайван Хитойнинг Европа қурол ишлаб чиқарувчиларига нисбатан қўллаган санкцияларини аҳамиятсиз деб атади

Мамлакат Мудофаа вазири Веллингтон Ку Пекин томонидан оролга қурол сотган Европанинг еттита компаниясига нисбатан жорий этилган санкциялар Тайбэйнинг мудофаа қобилиятига таъсир қилмаслигини таъкидлади. Хитой Тижорат вазирлиги ушбу компанияларга икки томонлама мақсаддаги товарлар экспортини тақиқлаган эди. Санкцияга учраган компанияларнинг тўрттаси Чехияга тегишли.

Вазирнинг сўзларига кўра, Хитой бу каби чораларни биринчи марта қўллаётгани йўқ ва Тайван диверсификация қилинган каналлар орқали қурол сотиб олишни давом эттиради.

Маълумот учун, Тайван қурол-яроғнинг асосий қисмини АҚШдан олади, бироқ сўнгги йилларда, айниқса Украинадаги урушдан кейин, Марказий ва Шарқий Европа давлатлари билан мудофаа соҳасидаги ҳамкорликлар фаоллашиб бормоқда.