Жанубий Кореяда вафот этган ўзбекистонлик Ким Нозима Акмал қизининг ўлими юзасидан тарқалаётган турли тасдиқланмаган хабарлар ортидан Ўзбекистоннинг Сеулдаги элчихонаси расмий муносабат билдирди. Унга кўра, ҳолат юзасидан Корея ҳуқуқ-тартибот органлари билан ҳамкорликда тергов ишлари олиб борилмоқда.
Элчихона маълум қилишича, воқеа содир бўлган кундан буён Корея полицияси билан яқин ҳамкорлик ўрнатилган бўлиб, тергов жараёнларининг холис ва тўлиқ ўтказилиши таъминланмоқда. Шу мақсадда марҳуманинг онаси Феруза Алимбекова ҳам Кореяга таклиф этилган.
14 апрель куни Пёнтек шаҳрида марҳуманинг онаси, унинг адвокати ҳамда элчихона ходимлари иштирокида маҳаллий полиция вакиллари билан учрашув ўтказилди. Унда тергов жараёни ва қўшимча текширув натижалари ҳақида маълумот берилган.
Корея ҳуқуқ-тартибот органлари дастлабки тергов ва суд-тиббий экспертиза хулосаларига кўра, марҳуманинг ўлимида қотиллик аломатлари аниқланмаганини билдирган. Шунингдек, чуқурлаштирилган таҳлиллар натижасида ўлим ҳолати ўз жонига қасд қилиш ташхиси асосида қайд этилгани маълум қилинган.
Экспертиза жараёнида ДНК, қон ва бармоқ излари текширилгани, танада заҳарли моддалар ёки кучли зарба излари аниқланмагани қайд этилган. Шунингдек, воқеа содир бўлган жой ва тиббий муассасалардаги кузатув камералари ёзувлари марҳуманинг яқинларига тақдим этилган.
Корея полицияси ижтимоий тармоқларда тарқалаётган айрим суратлар расмий тергов доирасида олинмаганини ва уларни тарқатиш мамлакат қонунчилигига зид эканини таъкидлаган.
Ҳозирда тергов ҳаракатлари давом этмоқда. Ўзбекистоннинг Сеулдаги элчихонаси мазкур ҳолатни назоратга олган бўлиб, Корея томони билан ҳамкорликни давом эттирмоқда.
Элчихона фуқароларни марҳуманинг хотирасини ҳурмат қилишга ва тасдиқланмаган маълумотларни тарқатмасликка чақирди.
Теҳрон Эрон кемасини қўлга олганидан кейин АҚШ ҳарбий кемаларига ҳужум қилди
Эрон АҚШни “якуний жазо” билан таҳдид қилди
Эрон Исроил билан алоқа қилганлиги учун юқори лавозимли амалдорни қатл қилди
