Сурия кучлари хавфсизлик операцияси давомида ўзбекистонлик жангариларни қўлга олди

Бу ҳақда Reuters хабар бермоқда.

Мамлакат хавфсизлик кучлари Сурия шимоли-ғарбида ўтказилган махсус операция давомида бир гуруҳ ўзбекистонлик жангариларни ҳибсга олди.

Хавфсизлик идораларининг икки нафар вакили маълум қилишича, Идлиб шаҳрида ўзбекистонлик жангарилардан бирининг ўт очганликда айбланиб қўлга олиниши ортидан бошланган кескинлик оммавий норозиликларга айланиб кетган.

Маҳаллий аҳоли ва расмийларнинг сўзларига кўра, қуролланган ўзбекистонлик жангарилар ўз сафдошларининг озод этилишини талаб қилиб, ҳукумат хавфсизлик объекти олдида намойиш ўтказган. Бунга жавобан хавфсизлик кучлари Идлиб вилоятининг Кафрия ва Ал-Фуа шаҳарлари каби ҳудудларида ҳибсга олиш ишларини олиб борди. Ушбу шаҳарлар атрофига қўшимча ҳарбий бўлинмалар ва колонналар жойлаштирилди, вақти-вақти билан отишма овозлари эшитилди. Ҳозирча айнан қанча ўзбекистонлик қўлга олингани маълум эмас.

Маълумотларга кўра, ўтган йили Сурияда оилалари билан бирга 1500 га яқин ўзбекистонлик жангари бўлган. Бу воқеа Сурия ҳукумати учун 2011 йилдан кейин мамлакатга келган хорижлик жиҳодчилар устидан давлат назоратини ўрнатиш қанчалик мураккаб эканини кўрсатмоқда. Уларнинг аксарияти президент Аҳмад аш-Шараа бошчилигидаги гуруҳ таркибида жанг қилган. Сўнгги йилларда Сурия ҳукумати кўплаб хорижлик жангарилар мақомини расмийлаштириш ва уларни янги армия таркибига киритишга ҳаракат қилмоқда.

Ўтган йили Қўшма Штатлар Хитойдан келган уйғурлар ва қўшни давлатлар фуқаролари бўлган 3500 га яқин хорижлик жангарини Сурия армияси дивизиясига интеграция қилиш режасини маъқуллаган эди. Шунингдек, сўнгги йилларда Шараа Вашингтон билан яқин алоқалар ўрнатган ва Дамашқ Ислом давлатига қарши АҚШ бошчилигидаги коалицияга қўшилган, дейилади агентлик мақоласида.