Ҳимолайда 2021 йилда йўқолган россиялик талаба йилдан кейин Непалдаги баланд тоғли буддавий монастирда топилди

24 ёшли Алина Ветрова Аннапурна лагери ҳудудидан якка саёҳатга чиққанидан кейин бедарак йўқолган эди. Қутқарув операцияси 3 ҳафта давом этган, аммо қор кўчкиси туфайли у ҳалок бўлган деб ҳисобланиб, оиласи Новосибирскда рамзий дафн маросимини ўтказган. 2025 йил бошида эса National Geographic гуруҳи Непал тоғларидаги 4800 метр баландликда жойлашган ёпиқ монастирда европалик аёлни топган. У монахлар либосида бўлиб, тибет ва непал тилларида эркин гапира олган.

Алина тоғ касаллиги сабаб ҳушидан кетган ҳолда монахлар томонидан топилган ва даволанган. Шу вақт ичида у тибет тиббиёти, медитация ва доривор ўсимликларни ўрганишга киришган.

Журналистлар ундан қайтишни истайсанми, деб сўраганда у рус тилида, аммо акцент билан: «Мен аллақачон уйдаман. Тоғлар танланганларни қўйиб юбормайди», деб жавоб берган. Ота-онаси уни қидириб келишмоқда, учрашув ой охирига белгиланган.