«Биз ҳали ҳатто бошлаганимиз йўқ»: Теҳрон АҚШни огоҳлантирди

Эрон парламенти спикери Ҳормуз бўғозида «янги тенглама» шаклланаётганини маълум қилди.

Эрон парламенти спикери Муҳаммад Боқир Қолибоф Ҳормуз бўғози атрофида «янги тенглама» шаклланаётганини айтди ва АҚШни эҳтимолий эскалация ҳақида огоҳлантирди. Унинг сўзларига кўра, ҳозирги вазиятнинг давом этиши Вашингтон учун «қабул қилиб бўлмас» ҳолат ҳисобланади.

Х ижтимоий тармоғидаги баёнотида Қолибоф АҚШ ва унинг иттифоқчилари ҳаракатлари туфайли кемачилик хавфсизлиги ва энергия ресурслари транзити таҳдид остида қолганини таъкидлади. У уларни ўт очишни тўхтатиш тартибини бузиш ва блокада жорий этишда айблади.

«Биз ҳозирги вазиятнинг давом этиши Америка учун қабул қилиб бўлмаслигини яхши тушунамиз. Шу билан бирга, биз ҳали ҳатто бошлаганимиз йўқ», — деди у.

Эрон уруш бошланганидан кўп ўтмай Ҳормуз бўғозида хорижий кемаларга нисбатан блокада жорий этди. Уруш 28 феврал куни АҚШ ва Исроил зарбасидан сўнг бошланган бўлиб, натижада мамлакатнинг собиқ олий раҳбари ҳалок бўлган.

13 апрель куни АҚШ президенти Дональд Трамп Эрон портларидан фойдаланувчи кемаларга қарши жавоб блокадасини эълон қилди. Ундан бир кун олдин стратегик сув йўли орқали тиқилиб қолган тижорат кемаларини кузатиб ўтиш мақсадида «Озодлик лойиҳаси» операцияси бошлангани маълум қилинган эди.

Бироқ бундай ҳаракатлар жанговар тўқнашувлар қайта бошланиши хавфини оширади. Эрон Марказий ҳарбий қўмондонлиги аввалроқ Ҳормуз бўғозига яқинлашган ҳар қандай Америка ҳарбий кемасига зарба берилишини маълум қилган эди.