Солиқ қўмитаси туристик дала ҳовли ижараси бўйича таклиф этилаётган ўзгаришлар бўйича расмий ахборот берди

Қайд этилишича, қўмита томонидан туризм соҳасида уй-жой ижараси бозорини тартибга солишга қаратилган норматив-ҳуқуқий ҳужжат лойиҳаси ишлаб чиқилган. Ҳужжат жамоатчилик муҳокамасига қўйилган бўлиб, ҳар ким ўз таклиф ва мулоҳазаларини билдириши мумкин.

Қуйидаги ўзгаришлар таклиф этилмоқда:

— ижарага берилаётган туристик дала ҳовлилар ортиқча лицензия ва рухсатномаларсиз расмий ҳисобга олинади;
— бундай турар-жойлар учун туристик йиғим тўлаш талаб этилмайди;
— аҳоли учун ҳақиқий нархларни кўриш имконини берувчи ягона онлайн платформа яратилади;
— ижарага бериш тўғрисидаги маълумотлар ортиқча қоғозбозликларсиз рақамли сервислар орқали автоматик тарзда узатилади;
— турар-жойни ноқонуний ижарага бериш ҳолатлари ҳақида хабар берган шахсларга жариманинг 30 фоизигача миқдорда рағбат пули берилади.

Мазкур ташаббуснинг асосий мақсади – бозорни аниқ ва шаффоф ҳолатга келтириш, ҳалол ижара берувчилар учун қулай шароит яратиш ҳамда ноқонуний фаолиятни қисқартиришдан иборат, дейилади (https://t.me/soliqnews/18938) қўмита маълумотида.