НАТО мамлакатлари Германиянинг блокнинг жамоавий мудофаа қилинишига ўз ҳиссасини қўшишига шубҳа қилмаслиги керак. Германия канцлери Олаф Шольц чоршанба куни Бундестагда (парламент) чиқиш қилиб ҳукуматнинг ушбу баёнотини тарқатди.
"Бизнинг альянс бўйича ҳамкорларимиз биладики, улар бизга суяниши мумкин. Улар агар керак бўлса блокнинг ҳар бир қарич ерини ҳимоя қилишимизни яхши билишади", – деди канцлер. Унинг қўшимча қилишича, айнан шу мақсадда Германия парламенти мудофаа эҳтиёжлари учун 100 миллиард Евро ажратишга овоз берганди. Мазкур маблағ янги қурол-яроғлар, ҳарбий техникалар ва янги тизим ишланмаларини сотиб олишга сарфланади.
Сўнгги пайтларда Германияда кўплаб сиёсатчилар Бундесвернинг (Қуролли кучлар) етарли материал базага эга эмаслигини таъкидлашмоқда. Хусусан, Бундестагнинг мудофаа масалалари бўйича вакили Ева Хёгль Германия ўзининг қуролли кучларини етарлича модернизация қилмаётганлигини айтиб ўтганди. Шунингдек, Хёгль Германия ўзининг қуролли кучларини тўлиқ таъминлаш учун 20 миллиард еврога қурол-яроғ сотиб олиш кераклигини эслатган.
