Шольц АҚШ президенти Дональд Трампни Володимир Зеленскийни диктатор деб атагани учун танқид қилди

Германия канцлери Олаф Шольц АҚШ президенти Дональд Трампни Володимир Зеленскийни диктатор деб атагани учун танқид қилди.

«Президент Зеленскийни демократик легитимликдан маҳрум қилиш нотўғри ва хавфли қарор», — деди Шольц Der Spiegel журналига берган интервюсида.

Унинг сўзларига кўра, Зеленский «Украинанинг сайланган раҳбари» ҳисобланади.

«Уруш шароитида сайловлар ўтказилмаслиги Украина Конституцияси ва сайлов қонунларида ёзиб ўтилган. Ҳеч ким бу борада бошқача фикр билдирмаслиги керак», — деди у.

Шунингдек, Германия ташқи ишлар вазири Анналена Бербок ZDF телеканалига берган изоҳида Трампнинг сўзларини «абсурд» деб атади.

Аввалроқ Буюк Британия бош вазири Кир Стармер ҳам Зеленскийни демократик президент сифатида тан олишини билдирганди. «Бош вазир президент Зеленскийни Украинада демократик йўл билан сайланган лидер сифатида қўллаб-қувватлайди ва уруш вақтида сайловларни тўхтатиб туриш қарори мутлақо мантиқий эканлигини таъкидлайди. Буни Британия ҳам Иккинчи жаҳон уруши давомида амалга оширган», дейилади Британия ҳукумат баёнотида.