Россия ва Хитой АҚШнинг “Олтин гумбаз” лойиҳасига қарши чиқди

Россия ва Хитой глобал стратегик барқарорлик бўйича қўшма баёнот қабул қилди. Ҳужжатда таъкидланишича, АҚШнинг “Олтин гумбаз” номли ракеталарга қарши мудофаа дастури жиддий беқарорлаштирувчи хусусиятга эга.

Баёнотга кўра, мазкур лойиҳа АҚШни ҳар қандай ракеталар таҳдидидан ҳимоя қилиш мақсадида “ҳеч қандай чегарасиз, глобал, кўп даражали ва кўп соҳали” ПРО (ракеталарга қарши мудофаа) тизимини яратишни кўзда тутади.

Бундан ташқари, АҚШ “Олтин гумбаз”ни фақат ерда эмас, балки космик фазода ҳарбий операциялар олиб бориш учун ҳам ишлатишга ҳаракат қилмоқда. “Россия ва Хитой айрим давлатларнинг космосдан қуролли тўқнашув мақсадида фойдаланишига қарши чиқади ва фазони ҳарбий устунликка эришиш воситаси сифатида фойдаланишга қаратилган сиёсат ва фаолиятларга қарши курашади”, дейилади Кремль сайтида эълон қилинган баёнотда.

Шу муносабат билан, Россия ва Хитой космосда ҳарбий таъсир ўтказишнинг олдини олишга қаратилган глобал шартнома яратишни таклиф қилмоқда. Ушбу келишув “космосда қуролланиш пойгаси”ни тўхтатиш ва космик объектларга ҳужум қилиш хавфини бартараф этиши керак.

Маълумот учун, АҚШ президенти Дональд Трамп “Олтин гумбаз” лойиҳасини яратиш ҳақидаги фармонни 28 январь куни имзолаган. SpaceX компанияси ушбу лойиҳанинг дастлабки муҳандислик ва лойиҳа ишларини 6 миллиарддан 10 миллиард долларгача баҳолаган. CNN телеканали хабарига кўра, “Олтин гумбаз” Исроилнинг “Темир гумбаз”и каби, лекин ундан кўра кенг қамровли ва АҚШ ҳудудини тўлиқ ҳимоя қилишга мўлжалланган тизим бўлади.