Шимолий Корея АҚШни қўрқитди

Шимолий Корея стратегик қанотли ракеталарни синовдан ўтказди ва АҚШни қўрқитди.

Дональд Трамп Оқ уйга қайтганидан кўп ўтмай, Ким Чен Ин тахминан 1500 км масофага учадиган «денгиз-қуруқлик» синфига мансуб қанотли ракеталарини синовдан ўтказди.

«Корея Халқ Демократик Республикасининг (КХДР) ҳарбий тўсиқлари янада мукаммаллаштирилмоқда», — деди Шимолий Корея раҳбари.

Шимолий Кореянинг КCНА пропагандистик агентлиги эълон қилган бошқа бир баёнотда КХДР Ташқи ишлар вазирлиги номидан Жанубий Корея ва АҚШни ҳарбий провокацияларда айблади. Шимолий Корея Трамп ва АҚШ КХДРнинг суверенитети, хавфсизлиги ва манфаатларини тан олмагунча, «энг кескин жавоб қайтариш» билан таҳдид қилмоқда.

Шу билан бирга, яқинда Трамп Ким билан яна мулоқот қилиш истагини билдирган ва уни «ақлли йигит» деб атаган эди. Ким ҳам янги учрашувни (биринчи учрашув 2018 йилда бўлиб ўтган) кутаётган бўлиши мумкин.

Жанубий Кореядаги Фридрих Науманн жамғармаси директори Фредерик Шпор Bild газетасига шундай деди:

«Трамп лавозимга келганидан сўнг Ким ракета синовларини давом эттириши кутилган эди. У ўзининг қатъияти ва қуролларининг сифатини намойиш қилиши керак. <...> Агар Ким музокараларга жиддий ёндашаётган бўлса, у Трампнинг эътиборини шу йўл билан тортишга ҳаракат қилади.»

Ҳанкук университети профессори Мейсон Ричининг фикрича, Ким ва Трамп ўртасидаги музокаралар олдидан яна бир кескинлик юзага келиши мумкин. Унинг таъкидлашича, ҳам Вашингтон, ҳам Пхенян ўз таъсир кучини ошириш учун таҳдидлар, қурол синовлари ёки ҳарбий машғулотлардан фойдаланиши мумкин.

«Трампнинг мақсади Шимолий Корея ва Хитой ўртасидаги иттифоқни заифлаштириш бўлиши мумкин. У Хитойни АҚШ хавфсизлигига реал таҳдид деб билади», — дейди профессор Ричи.