Шаҳзода Эндрюни зўравонликда айблаган аёл ўлик ҳолда топилди

NBC News хабар беришича, Британия шаҳзодаси Эндрюни жинсий зўравонликда айблаган америкалик Виржиния Жуффре Ғарбий Австралиядаги фермасидаги уйида ўлик ҳолда топилган.

Жуффренинг қариндошлари баёнотига кўра, у ўз жонига қасд қилган. У 41 ёшда эди.

"Виржиния жинсий зўравонлик ва жинсий қулликка қарши курашда жасоратли жангчи эди. У кўплаб жабрланганларга ёрдам берган нур эди. Охир-оқибат зўравонлик юки шунчалик оғирлашдики, Виржиния уни энди кўтара олмай қолди," дея Жуффре оиласи баёнотидан иқтибос келтиради нашр.

Виржиния Жуффре 2021 йил август ойида Қиролича Елизавета II нинг ўғлига қарши жинсий зўравонлик бўйича даъво қўзғатган эди. Унинг айтишича, у ўсмирлик чоғида шаҳзода билан дўст бўлган америкалик молиячи Жеффри Эпштейннинг қурбонига айланган. Эпштейн 2019 йилда вояга етмаганларни жинсий эксплуатация қилишда айбланиб, қамоқхонада ўз жонига қасд қилган эди.

Жуффренинг айтишича, Эпштейн уни ўзининг нуфузли танишлари, жумладан, шаҳзода Эндрюга "фойдаланиш учун берган". 2001 йилда, 17 ёшида эканида, у Британия маликасининг ўғли билан уч марта жинсий алоқада бўлганини америкалик аёл маълум қилди.

Шаҳзода Эндрю бу айбловларни бир неча бор инкор этган. Ню-Ёрк суди даъвони рад этишдан бош тортганидан сўнг, у ҳарбий унвонларидан маҳрум этилди, шунингдек, қироллик ҳомийлик вазифаларини топширди ва "Қироллик олий ҳазратлари" унвонидан воз кечди. 2022 йил февралда шаҳзода Эндрю ва Виржиния Жуффре судгача келишувга эришгани эълон қилинди. Шаҳзода Эндрю Жуффрега товон пули тўлашга розилик билдирди, аммо унинг миқдори ошкор қилинмади.