Сербияда ҳукуматга қарши янги йирик норозилик намойишлари бўлиб ўтди

Сербияда ҳукуматга қарши янги йирик норозилик намойишлари бўлиб ўтди.

1 феврал куни ўн минглаб одамлар Дунай дарёси устидаги кўприкларни тўсиш учун Нови-Садда тўпланди. “Уч ой – уч кўприк” деб номланган акция Нови-Саддаги вокзал пештоқининг қулаб тушганига уч ой тўлиши муносабати билан ташкиллаштирилди.

Намойиш иштирокчилари кўприклар ва уларга туташ бўлган йўлларда ҳаракатни тўсиб қўйишди. Натижада шаҳарда йирик тирбандликлар юзага келди. Сербиядаги норозилик намойишларининг асосий кучи талабалар бўлди. Намойишчиларга фермерлар ҳам қўшилди, улар ўз тракторларида кўприкларни тўсиб қўйишди.

Сербия бўйлаб намойишлар Нови-Сад вокзали пештоқининг қулаб тушиши оқибатида 15 киши ҳалок бўлганидан кейин бошланди. Кўпчилик ушбу фожианинг сабаби ҳукуматнинг коррупцияга ботганлиги ва Хитой компаниялари иштирокида амалга оширилган йирик инфратузилма лойиҳаларидаги қонунбузарликлар эканига ишонмоқда.