Сайловда мағлуб бўлиш хавфи Трамп маъмуриятидаги ички зиддиятларни кучайтирди

АҚШда 3 ноябрь куни бўлиб ўтадиган Конгрессга оралиқ сайловларда республикачилар мағлуб бўлиши мумкинлиги ҳақидаги хавотирлар Дональд Трамп маъмурияти ичидаги келишмовчиликлар ва ҳокимият учун курашни кучайтирди. Бу ҳақда CNN хабар берди.

Нашр маълумотларига кўра, бир вақтлар садоқат устувор бўлган Оқ уйда ҳозир ўзаро ишончсизлик ва маълумотларнинг оммага сиздирилиши билан боғлиқ ҳолатлар кўпайган. Бу кадрлар ўзгаришига, жумладан, АҚШнинг Грециядаги элчиси ва Оқ уй матбуот котибининг лавозимидан кетишига олиб келган.

Шу билан бирга, Оқ уй аппарати раҳбари Сюзи Уайлс каби юқори лавозимли амалдорларга босим кучаймоқда. Айрим вазирларнинг лавозимидан кетиши ва ҳарбий котибга нисбатан импичмент масаласи ҳам муҳокама қилинмоқда.

Аввалроқ Politico нашри Оқ уй аппарати раҳбари Сюзи Уайлс президент матбуот котиби Кэти Закариянинг Fox News телеканалига берган баҳсли интервьюсини ташкил этишда иштирок этгани ҳақида хабар берган эди. Интервьюдан бир неча соат ўтгач, Закария лавозимидан озод қилинган. Бу ҳолат Оқ уйдаги ички келишмовчиликлар ҳақидаги тахминларни кучайтирган.

CNN таъкидлашича, республикачилар Вакиллар палатасидаги кўпчилик ўринларини йўқотиш хавфига дуч келаётган бир пайтда, Трампнинг маслаҳатчилари президент мағлубият учун жавобгарликни ўз зиммасига олмаслиги ва ўзининг яқин атрофидаги амалдорларни оммавий равишда ишдан бўшатишни бошлашидан хавотирда.

Оқ уйдаги келишмовчиликлардан яна бири Трамп ва вице-президент Жей Ди Вэнснинг мамлакатдаги иқтисодий вазиятга берган баҳолари ўртасидаги фарқ бўлди.

Associated Press агентлиги маълумотларига кўра, Трамп АҚШда «олтин давр» бошланганини таъкидлаётган бир пайтда, Вэнс америкаликлар дуч келаётган иқтисодий қийинчиликларни тан олмоқда. Бу тафовут сайловлар арафасида маъмурият ваъдаларидан аҳолининг турмуш харажатлари ошиши билан боғлиқ хавотирларигача бўлган масофани кўрсатади.

Трамп яшаш харажатларининг юқорилиги ҳақидаги жамоатчилик хавотирларини рад этиб, АҚШ аввалгидан ҳам яхшироқ аҳволда эканини таъкидламоқда. Вэнс эса иқтисодий ўсиш америкаликлар кутган даражада тез эмаслигини ва бензин нархлари юқорилигича қолаётганини тан олган.

АҚШда Конгрессга оралиқ сайловлар ҳар тўрт йилда президентлик муддатининг ўртасида ўтказилади. Одатда, амалдаги президентнинг партияси ушбу сайловларда Конгрессдаги ўринларининг бир қисмини йўқотади. Бу овоз бериш жараёни кўпинча сайловчилар учун маъмурият сиёсатига муносабатини билдириш имконияти бўлади.

Бу сафар республикачилар бир қатор жиддий муаммоларга дуч келмоқда. Энергия нархларининг ошиши, инфляция, Эрон билан уруш ва бу омилларнинг аҳоли харид қобилиятига таъсири жамоатчилик норозилигини кучайтирган. Республикачиларнинг айрим вакиллари ҳам ушбу масалаларда Трамп билан бир фикрда эмас. Бу эса партия ичидаги бўлинишларни чуқурлаштирмоқда.

Ҳозирда республикачилар Вакиллар палатасида 218 та, демократлар эса 214 та ўринга эга. Шу сабабли, бир нечта сайлов округидаги натижаларнинг ўзгариши ҳам палата устидан назоратнинг демократлар қўлига ўтишига олиб келиши мумкин.

Сенатда эса республикачилар 53 та, демократлар 47 та ўринни эгаллаган. Демократлар учун Сенатда кўпчиликни қўлга киритиш қийинроқ бўлса-да, сўнгги ойларда кучлар нисбати ўзгариши эҳтимоли ҳам ортган.

АҚШда Конгрессга оралиқ сайловлар 3 ноябрь куни бўлиб ўтади. Унда Сенатнинг 100 та ўрнидан 33 таси ва Вакиллар палатасининг барча 435 та ўрни учун кураш кечади.