Саида Мирзиёева: “Бугун кўча чангитиб тўп тепаётган ҳар бир болакай учун ўйнанг”

Саида Мирзиёева футболчиларимизни жаҳон чемпионатига кузатиш тадбири таассуротлари билан ўртоқлашди.

"Кеча Президентимиз Ўзбекистон миллий терма жамоасини Жаҳон чемпионатига кузатиш маросимида иштирок этдилар. Биз ҳам ўғлим билан ушбу қувончли лаҳзаларда уларга ҳамроҳ бўлдик. Юраклар ҳис-ҳаяжонга тўлиб-тошган, чунки бу бутун Ўзбекистон учун чинакам тарихий воқеа — мамлакатимиз илк бор жаҳоннинг энг нуфузли мусобақасида қатнашади.

Ўғлимнинг кўзларида — қувонч ва фахр. Қўлида — қаҳрамонларимиз дастхати туширилган тўп, энди уни бебаҳо хазинадек асрайди. Қалбида бўлса миллий жамоамизга бўлган ишонч.

Йигитлар, сиз аллақачон улкан маррани забт этдингиз — халқимиз қалбида орзу ва ишонч уйғотдингиз. Энди эса ўзбек футболи нималарга қодир эканини бутун дунёга кўрсатиб қўйинг. Майдонга дадил тушинг, юрагингизни бериб ўйнанг. Бугун кўча чангитиб тўп тепаётган, бир кун келиб миллий терма жамоа либосини кийишни орзу қилаётган ҳар бир болакай учун ўйнанг. Биз сизга ишонамиз. Бутун мамлакат сизга ишонади. Президентимиз сизга ишонади.

Олға, Ўзбекистон!".