Россиянинг санкция остидаги кемаси Малига ҳарбий техника етказиб берди

​Россиянинг 2024 йилда АҚШ санкциялари рўйхатига киритилган "Михаил Бритнев" юк кемаси июл бошида Тогонинг Ломе портига ҳарбий техника етказиб берди. Бу техника кейинроқ Мали пойтахти Бамакога ўтказилган.

​Журналистларнинг аниқлашича, сузиш воситаси 18 июн куни Россиянинг Балтийск портидан чиқиб, 9 июл куни Ломе портига етиб келган. Йўл давомида кема ўз жойлашувини аниқлаш имконини берувчи транспондерларни ўчириб қўйган.

​25 июл куни Мали давлат телевидениеси Бамакога етиб келган катта сондаги бронетехника колоннасини намойиш этди. Йўлдошдан олинган тасвирлар "Михаил Бритнев" ушбу колоннада кўринган юк машиналари, бронетранспортёрлар ва енгил пиёдалар жанговар машиналарини ташиганини кўрсатади.

​Малида 2021 йилги тўнтариш натижасида ҳокимиятга келган ҳарбий ҳукумат мамлакат шимолида ўз давлатини тузишга уринаётган туарег исёнчи гуруҳларига қарши қуролли кураш олиб бормоқда. Москва 2022 йилдан буён Мали ҳарбий ҳукуматини қўллаб-қувватлаб келмоқда ва бунинг эвазига молиявий тўловлар ҳамда олтин конларига устувор фойдаланиш ҳуқуқини олмоқда.