Мексикада “Картел де лос Реес” жиноий гуруҳининг раҳбари Алфонсо Фернандес Магалён ушланди. Жиноий оламда “Пончо Ла Кирингуа” номи билан танилган ушбу шахс учун АҚШ 5 миллион доллар мукофот эълон қилганди. Бу ҳақда Мексика хавфсизлик вазири Омар Гарсия Арфуч маълум қилди.
Хабар берилишича, ҳибсга олиш тадбири Мексиканинг Мичоакан штатининг Имбаракуаро қишлоғида ўтди. Бу Магалённинг ўз жиноий фаолиятини олиб борган ҳудуд ҳисобланган. Амалиётда армия ва Миллий гвардия бошчилигидаги федерал кучлар, денгиз флоти, Бош прокуратура ҳамда штат полицияси қатнашган.
Наркобароннинг ушланиши гуруҳ аъзоларининг кескин қаршилигига сабаб бўлди. Улар ҳибсга олинганларни олиб кетишга халақит бериш учун йўлларни автомобиллар билан тўсиб, машиналарга ўт қўйди.
Фернандес Магалён автомобил ўғирлаш, товламачилик ва наркотик савдосида ҳам айбланмоқда. Унга нисбатан АҚШ Миллий хавфсизлик бошқармаси ҳам тергов олиб бормоқда. У билан бирга яна икки киши — Мартин Силва Осорно ва Федерико Пласенсия Мендосу ҳам қўлга олинган. Улардан гиёҳванд моддалар, қурол ва ўқ-дорилар мусодара қилинган.
Ушланганлар Мексика Ҳаво кучлари вертолётида пойтахтга олиб кетилган ва Бош прокуратурага топширилган. Фернандес Магалён “Эл Абуело” (Бобо) лақабли Хуан Хосе Фариас Алвареснинг ишончли одами саналади. Тепалкатепек картелига раҳбарлик қилувчи ушбу шахс учун ҳам АҚШ 10 млн доллар ваъда қилган.
Саудия Арабистони валиаҳд шаҳзодаси Трампни Эронга қарши бошқа ҳужумлар уюштирмасликка чақирди
Хитой электромобиллари омборларда тўпланиб қолмоқда
Флоренцияда “биринчи Cоcа-Cola” рецепти топилди
