Россия ва Хитой Марсни ўрганиш бўйича қўшма миссия учун техника ишлаб чиқаришни бошлади

Россия ва Хитой Марсни ўрганишга қаратилган қўшма космик миссия учун асбоб-ускуналар ва техник воситалар ишлаб чиқаришни бошлади. Бу ҳақда «Роскосмос» давлат корпорацияси бош директори Дмитрий Баканов маълум қилди, деб хабар берди РИА Новости.

Баканов Санкт-Петербургда Россия ва Хитой ҳукумат раҳбарлари иштирокида ўтказилган учрашувда қатнашган.

«Бизда “Чанъэ-7” қўшма ой миссияси ҳам бор. Шунингдек, Марсни ўрганиш бўйича қўшма миссияни ҳам бошлаяпмиз — сайёрани тадқиқ қилиш учун асбоб-ускуналар ва техник воситалар ишлаб чиқарилмоқда», — дея Бакановнинг сўзларини келтирди «Роскосмос».

«Роскосмос» раҳбари Хитойни Россиянинг муҳим ҳамкорларидан бири деб атади.

Унинг таъкидлашича, икки мамлакат Ерни масофадан зондлаш маълумотларини ўзаро алмашмоқда, шунингдек, Россиянинг ГЛОНАСС ва Хитойнинг «Бэйдоу» сунъий йўлдош навигация тизимлари сигналларидан ҳамкорликда фойдаланмоқда.