Россия-НАТО кенгаши бекор қилинади

Россия-НАТО кенгаши тугатилади.

Бу ҳақда Польша ташқи ишлар вазири Радослав Сикорский альянс ташқи ишлар вазирларининг Брюсселдаги йиғилиши якунлари бўйича журналистларга маълум қилди.

"Расмий қарорлар орасида мен Бош котиб Марк Рюттенинг Россия-НАТО кенгаши энди мавжуд эмаслиги ҳақидаги баёнотини таъкидламоқчиман. Россия-НАТО кенгаши ва Россия-НАТО таъсис тўғрисидаги қонун энди мавжуд эмас", деди Сикорский TVP Info телеканали орқали эфирга узатилган матбуот анжуманида.

Россия ва НАТО ўртасидаги муносабатлар 1990 йиллар бошида ўрнатилган. 1997 йилда томонлар бир-бирларини душман сифатида кўрмасликларини тасдиқловчи ва маслаҳатлашув механизмини ўрнатган Таъсис актини имзоладилар. 2002 йилда Россия-НАТО кенгаши тузилди.

2014 йилгача Россия ва НАТО терроризм, гиёҳванд моддалар савдоси ва қароқчиликка қарши курашда ҳамкорлик қилиб келган. Россиянинг Украинага кенг кўламли бостириб кириши ортидан альянс ҳамкорликни музлатиб қўйди.